ZDP: Zona densamente poboada; ZIP: Zona intermedia; ZPP: Zona pouco poboada

Información para Galicia segundo o grao de urbanización

Distribución do Produto Interior Bruto (PIB) de Galicia segundo o grao de urbanización.

No ano 2020 o 44,7% do PIB de Galicia xérase na zona máis poboada, con 26.243 millóns de euros, mentres que a zona que menos contribúe ao total do PIB é a ZPP. Con respecto ao 2018 diminuíu o peso das zonas ZIP e ZPP na distribución do PIB de Galicia e incrementouse a ZDP. En todo caso, con respecto a 2018, estes cambios non superan as nove décimas.

Distribución do Produto Interior Bruto (PIB) segundo o sector de actividade por grao de urbanización.

Ao considerar a distribución do PIB por sectores de actividade nas distintas zonas de urbanización obsérvase que o peso do sector servizos diminúe co grao de urbanización e, pola contra, o peso do sector primario aumenta de forma notable a medida que decrece o grao de urbanización. No que respecta aos sectores da industria e a construción, tamén neste caso semella existir unha relación inversa entre o peso destes no PIB e o grao de urbanización, sendo, de novo, a zona pouco poboada onde a industria e a construción achegan máis valor engadido en termos relativos á economía da rexión.

Baixo o epígrafe de Impostos netos inclúense fundamentalmente impostos ao consumo como o IVE e os impostos especiais. Estes representan unha maior proporción do PIB nas ZPP debido a que nestas zonas hai unha menor actividade económica por habitante, e unha porcentaxe de poboación inactiva máis elevada. A estrutura produtiva da ZIP é máis similar á estrutura produtiva de Galicia que o das outras zonas.

Información para Galicia segundo o subgrao de urbanización

Distribución do Produto Interior Bruto (PIB) de Galicia segundo o subgrao de urbanización.

Non existe unha relación directa entre o subgrao de urbanización e a contribución ao PIB. As subzonas que menos contribúen á xeración de valor en Galicia no ano 2.020 son a ZPP intermedia, a ZPP alta e a ZIP baixa (no caso da ZPP intermedia non chega ao 4%). A ZIP alta achega un 26,5% do PIB, e constitúe o segundo subgrupo por volume de actividade económica. Cómpre destacar que nos concellos da ZPP baixa xérase o 12,9% do PIB galego.

Distribución do Produto Interior Bruto (PIB) de Galicia segundo rama de actividade por subgrao de urbanización.

Ao considerar a estrutura produtiva segundo subzonas de urbanización repítese a relación inversa entre achega do sector primario e subgrao de urbanización. Outro factor relevante, ao analizar a estrutura produtiva a doce ramas de actividade, é a descomposición do sector servizos. Neste sector, a rama de actividade das administracións públicas e a educación e sanidade (de mercado e non mercado) é o factor diferencial que fai que a achega dos servizos sexa tan elevada nestas zonas máis urbanizadas (ZDP). Tamén contribúe unha maior presenza de servizos relacionados coa actividade empresarial (Actividades de información, financeiros, inmobiliarios e empresariais).

A achega da industria é sobranceira nas ZIP baixa, ZPP intermedia e ZPP baixa. Nas tres zonas destaca o elevado peso no PIB da rama “Enerxía, suministro de auga e xestión de residuos”. Outro trazo significativo das estruturas produtivas por subgrao é que a achega ao PIB da Industria Agroalimentaria é máis elevada nas ZIP e na ZPP alta que nas que presentan menor subgrao de urbanización, a pesar da elevada achega das actividades do sector primario. Nas ZPP baixa destacamos tamén a rama de actividade das “Industrias extractivas e fabricación de outros produtos minerais non metálicos” que, ao igual que ocorre co sector primario, dependen do aproveitamento de recursos naturais.

Definicións, fontes e máis información

Definicións

Valor engadido bruto (VEB)

Para cada unidade dedicada a unha actividade produtiva, é a diferenza entre a produción e os consumos intermedios. A suma dos valores engadidos brutos, máis os impostos netos de subvencións sobre os produtos, dan como resultado o Produto Interior Bruto polo lado da oferta.

Descarga de datos:

• Distribución do Produto Interior Bruto (PIB) por grao de urbanización segundo sector de actividade. Revisión estatística 2019
• Distribución do Produto Interior Bruto (PIB) por sector de actividade segundo o grao de urbanización. Revisión estatística 2019
• Distribución do Produto Interior Bruto (PIB) por subgrao de urbanización segundo sector de actividade. Revisión estatística 2019
• Distribución do Produto Interior Bruto (VEB) por rama de actividade segundo o subgrao de urbanización. Revisión estatística 2019

Fontes de información:

IGE. Elaboración propia a partir de: IGE.Produto interior bruto municipal. Revisión estatística 2019.

Os datos do ano 2020 son provisionais.