Principais resultados

• En abril de 2025, rexistráronse en Galicia 411 constitucións de sociedades mercantís, 45 máis que no mes anterior.

• Este mes, rexistráronse en Galicia 88 disolucións de sociedades mercantís, 37 menos que no mes anterior.

Introdución

A Explotación do Boletín Oficial do Rexistro Mercantil (BORME) é unha operación estatística que elabora o Instituto Galego de Estatística (IGE) con carácter mensual. Como indica o seu nome, a información difundida mediante esta estatística procede da explotación do Boletín Oficial do Rexistro Mercantil (máis coñecido polas súas siglas BORME), atendendo para facer os cálculos á data de publicación de cada incidencia.

O obxectivo desta operación é medir a demografía das sociedades mercantís en Galicia, ofrecendo información sobre os seguintes puntos:

• As empresas creadas, as que amplían e reducen capital, e as que desembolsan dividendos pasivos.
• Información sobre as empresas en situación concursal e as quebras, disolucións, extincións e transformación de sociedades ocorridas no mes de estudo.
• Información sobre o número de socios fundadores das sociedades constituídas cada mes, así como da súa distribución por sexo.

Constitucións e ampliacións

En abril de 2025 constituíronse en Galicia 411 sociedades mercantís. Este mes rexistráronse 45 constitucións máis que no mes anterior e 26 menos que no mesmo mes do ano anterior. O capital medio¹ subscrito polas sociedades constituídas en abril de 2025 ascendeu a 29.247,18 euros por sociedade.

Por outra banda, en abril de 2025 ampliaron o seu capital social 93 sociedades mercantís. O capital ampliado por estas sociedades ascendeu a 110,35 millóns de euros. Con respecto ao mesmo mes do ano pasado, en abril de 2025 ampliaron capital 17 sociedades menos que as rexistradas hai 12 meses.

Como en meses precedentes, en abril de 2025 as provincias de A Coruña e Pontevedra rexistraron o maior número de constitucións, co 37,71% das sociedades mercantís creadas no primeiro caso e o 43,55% no segundo. O 11,92% das novas empresas constituídas fixou a súa sede na provincia de Lugo e o outro 6,81% restante na provincia de Ourense.

Demografía das empresas constituídas

Case todas as empresas constituídas en abril de 2025 en Galicia adoptaron a forma de sociedades de responsabilidade limitada. O capital medio subscrito por este tipo de sociedades foi de 29.445,68 euros por empresa.