Introdución

A partir da información proporcionada polas proxeccións a curto prazo elaboradas cada dous anos polo Instituto Nacional de Estadística (INE), o IGE elabora a desagregación territorial das mesmas, ata o nivel de comarcas. Preséntanse neste momento os resultados obtidos para o período 2024-2039, por sexo e grupos quinquenais de idade. A información relativa a poboación está referida ao 1 de xaneiro de cada ano; a relativa aos fenómenos demográficos asociados, como por exemplo os nacementos, as defuncións ou os saldos migratorios, fai referencia a anos completos. Pode consultarse como se calcularon estas proxeccións na metodoloxía.


Variación da poboación

No caso de mantérense as tendencias demográficas actuais, Galicia presentaría un comportamento de crecemento poboacional dende 2024 ata o 1 de xaneiro de 2030, pasando a decrecer entre esa data e a fin da proxección, en 2039; no total do período experimentaríase unha caída do 0,3%.


Variación anual da poboación residente en Galicia
Unidade: porcentaxe (%)

Fonte: INE. Proyecciones de población (descarga da táboa)


Por provincias, as de Lugo e Pontevedra son as que manifestarían diminucións máis acusadas, dun 2,6% e 0,6% respectivamente, mentres que na provincia de Ourense a poboación practicamente non variaría e na provincia da Coruña agardaríase un incremento da poboación no período de proxección do 0,5%.


Poboación residente no 1 de xaneiro de cada ano. Galicia e provincias
Unidade: persoas, porcentaxe (%)

Espazo 2024 2039 Taxa de variación
Galicia 2.705.741 2.697.267 -0,3
  • A Coruña
1.128.187 1.134.215 0,5
  • Lugo
324.844 316.442 -2,6
  • Ourense
304.485 304.538 0,0
  • Pontevedra
948.225 942.072 -0,6

Fonte: INE. Proyecciones de población (descarga da táboa)


A diminución da poboación galega explicaríase maioritariamente polo saldo vexetativo negativo no período, que seguiría a tendencia observada nos últimos anos, aínda que cómpre salientar que se espera que tanto nacementos como defuncións experimenten crecementos durante os vindeiros anos. Asi, se en 2024 o saldo vexetativo se situaría na cifra de -20.548 persoas, en 2038 proxéctase en -20.253 persoas.Porén, o saldo migratorio en Galicia presentaría signo positivo en todo o período da proxección, acadando o seu valor máximo durante o ano 2024, 28.355 persoas; en 2038 proxéctase un saldo migratorio para Galicia de 14.777 persoas.


Saldos vexetativo e migratorio proxectados. Galicia
Unidade: persoas

Fonte: INE. Proyecciones de población (descarga da táboa)


Por áreas (agrupación de comarcas), gañarían poboación nos vindeiros anos a Área da Coruña, un 6,6%, Área de Santiago, un 3,7%,Ourense central, un 2,5%,Área de Ourense, un 2,1% e Área de Vigo, un 1,2%. Por outra parte, as que presentarían un maior decrecemento poboacional entre 2024 e 2039 serían as de A Coruña suroriental, cunha diminución do 8,1%, a de Área da Costa da morte, cun decrecemento do 7,9%, a de Ferrol-Eume-Ortegal, cun descenso do 5,9%, e a Lugo oriental, cunha diminución do 5,8%.


Poboación residente no 1 de xaneiro de cada ano. Áreas xeográficas
Unidade: persoas, porcentaxe (%)

Espazo 2024 2039 Taxa de variación
A Coruña suroriental 63.486 58.348 -8,1
Ferrol-Eume-Ortegal 185.372 174.492 -5,9
Área da Costa da morte 128.604 118.481 -7,9
A Barbanza-Noia 98.442 93.229 -5,3
Área da Coruña 453.766 483.775 6,6
Área de Santiago 198.517 205.890 3,7
Lugo sur 47.172 46.773 -0,8
Lugo oriental 35.917 33.826 -5,8
Lugo central 171.610 168.903 -1,6
A Mariña 70.145 66.940 -4,6
O Carballiño-O Ribeiro 41.507 40.912 -1,4
Ourense central 46.013 47.174 2,5
Ourense sur 72.580 69.100 -4,8
Área de Ourense 144.384 147.352 2,1
Pontevedra nororiental 63.008 60.090 -4,6
Pontevedra sur 105.607 104.141 -1,4
Caldas-O Salnés 144.006 142.386 -1,1
O Morrazo 82.250 79.752 -3,0
Área de Pontevedra 125.120 122.167 -2,4
Área de Vigo 428.233 433.536 1,2

Fonte: IGE. Proxeccións de poboación (descarga da táboa)


Por comarcas, segundo estas estimacións Ortegal perdería case a cuarta parte da súa poboación nos próximos quince anos, cun decrecemento no período do 24,7%. Por outra banda, prevese que varias comarcas gañen máis do 5% de poboación no período considerado: A Coruña, Valdeorras, e Santiago.


Variación da poboación residente entre 2024 e 2039. Comarcas
Unidade: porcentaxe (%)