Contas das sociedades mercantís de Galicia
Datos correspondentes ao ano 2023
Data de publicación: 05/09/2025
descarga en pdf
Principais resultados
O número de sociedades mercantís que en 2023 presentaron as súas contas anuais nos Rexistros Mercantís de Galicia foi de 48.079 sociedades mercantís. Con eses datos, a taxa interanual foi do 3,59%.
O importe neto da cifra de negocios desas sociedades mercantís foi de 137.026 millóns de euros.
O 89,4% desas sociedades obtiveron unha cifra de negocios inferior aos 2 millóns de euros
1 Información por provincias
No ano 2023, 48.079 sociedades mercantís presentaron as súas contas anuais nos Rexistros Mercantís de Galicia. A meirande parte destas teñen a sede social na provincia da Coruña (o 39% das empresas que presentaron as contas) e na de Pontevedra (38,3%).
O activo das empresas con sede en Galicia ascende a 165.345 millóns de euros. No ano 2023 o importe neto da cifra de negocios destas empresas situouse nos 137.026 millóns de euros e xeraron un valor engadido de 32.874 millóns de euros.
Por outra banda, os gastos de persoal situáronse nos 16.930 millóns de euros, mentres que os resultados de esxplotación ascenderon a 11.843 millóns de euros.
| Variables | Galicia | A Coruña | Lugo | Ourense | Pontevedra |
|---|---|---|---|---|---|
| Número de empresas | 48.079 | 18.742 | 5.975 | 4.957 | 18.405 |
| Total activo | 165.345 | 106.533 | 8.825 | 9.176 | 40.812 |
| Importe neto da cifra de negocios | 137.026 | 72.583 | 8.067 | 7.751 | 48.625 |
| Gastos de persoal | 16.930 | 8.862 | 1.178 | 1.085 | 5.805 |
| Resultado de explotación | 11.843 | 8.555 | 573 | 528 | 2.188 |
| Valor engadido | 32.874 | 20.017 | 2.111 | 1.928 | 8.818 |
| Fonte: IGE. Contas das sociedades mercantís de Galicia (descarga da táboa) |
As empresas con sede social na provincia da Coruña aglutinan o 64,4% do activo total das sociedades mercantís que presentaron as contas no ano 2023. Se nos fixamos na variable “importe neto da cifra de negocios”, as empresas da provincia da Coruña xeraron o 53% do importe neto da cifra de negocios total.
2 Información por tamaño da empresa
O 89,4% destas sociedades mercantís teñen a consideración de microempresas. O 8,1% agrúpase dentro da categoría de “pequena” empresa. E o 2,5% restante, teñen a consideración de mediana e gran empresa.
| Variables | Total | Micro | Pequena | Mediana-grande |
|---|---|---|---|---|
| Número de empresas | 48.079 | 42.972 | 3.917 | 1.190 |
| Total activo | 165.345 | 33.554 | 18.281 | 113.511 |
| Importe neto da cifra de negocios | 137.026 | 13.972 | 16.151 | 106.903 |
| Gastos de persoal | 16.930 | 4.267 | 3.236 | 9.427 |
| Resultado de explotación | 11.843 | 900 | 1.081 | 9.862 |
| Valor engadido | 32.874 | 6.155 | 5.037 | 21.682 |
| Fonte: IGE. Contas das sociedades mercantís de Galicia (descarga da táboa) |
Nota: as microempresas son aquelas cuxa cifra de negocio non chega aos 2 millóns de euros anuais; o termo “pequena” empresa aglutina ás que teñen unha cifra de negocio anual de entre 2 e 10 millóns de euros; e as medianas e grandes empresas son aquelas que superan os 10 millóns de euros de cifra de negocio anual.
A pesar de representaren o 89,4% das sociedades mercantís de Galicia, as microempresas achegaron o 10,2% do importe neto da cifra de negocios no ano 2023 (uns 13.972 millóns de euros), fronte ao 78% das medianas e grandes empresas (106.903 millóns de euros). Se nos fixamos na variable “gastos de persoal”, a diferenza entre ambas tipoloxías de empresas non é tan acusada; no ano 2023 situáronse nos 4.267 millóns de euros no caso das microempresas e nos 9.427 para as medianas e grandes empresas.
O 66% do valor engadido das sociedades mercantís que presentaron as súas contas anuais en Galicia no 2023 foi xerado por medianas e grandes empresas; o 18,7% por microempresas e o 15,3% restante por pequenas empresas.
Importe neto da cifra de negocios das sociedades mercantís segundo o tamaño da empresa. Galicia. Ano 2023
Unidade: porcentaxe (%)
Fonte: IGE. Contas das sociedades mercantís de Galicia (descarga da táboa)
3 Comparación homoxénea1
O importe neto da cifra de negocios das sociedades mercantís que presentaron as súas contas anuais nos Rexistros Mercantís de Galicia tanto en 2022 como en 2023 incrementouse un 5,3%. A evolución das restantes variables que se presentan na táboa anexa tamén foi positiva entre estes dous exercicios: os gastos de persoal incrementáronse un 10,4%; o resultado de explotación aumentou un 14,9%; entre 2022 e 2023, o valor engadido incrementouse un 10,8%; e o activo total incrementouse un 3,3%, entre ambos os dous períodos.
| Variables | 2018 | 2019 | 2020 | 2021 | 2022 | 2023 |
|---|---|---|---|---|---|---|
| Total activo | 10,9 | 11,6 | 3,3 | 5,0 | 8,0 | 3,3 |
| Importe neto da cifra de negocios | 12,0 | 5,6 | -15,0 | 16,8 | 29,8 | 5,3 |
| Gastos de persoal | 7,2 | 6,0 | -5,3 | 11,8 | 12,5 | 10,4 |
| Resultado de explotación | 106,5 | 6,0 | -60,8 | 7,9 | 25,7 | 14,9 |
| Valor engadido | 45,9 | 21,9 | -44,1 | 11,4 | 16,9 | 10,8 |
| Fonte: IGE. Contas das sociedades mercantís de Galicia (descarga da táboa) |
Se nos centramos na variable “importe neto da cifra de negocios” e analizamos a súa evolución nos derradeiros anos, obsérvase que, despois da caída do ano 2020, que tivo moito que ver coa paralización da actividade económica derivada da pandemia da COVID-19, recupera a senda do crecemento. No ano 2023, o ritmo de crecemento volve a valores similares a os do ano 2019
Evolución do importe neto da cifra de negocios das sociedades mercantís (comparativa en base homoxénea). Galicia
Unidade: taxa de variación interanual (%)
Fonte: IGE. Contas das sociedades mercantís de Galicia (descarga da táboa)
4 Notas metodolóxicas
O obxectivo central da operación estatística Contas das sociedades mercantís de Galicia é ordenar, agregar e difundir a información económico-financeira das empresas con sede social en Galicia, para un mellor coñecemento da súa actividade en termos contables. Ademais deste, a operación tamén buscar proporcionar información detallada que permita:
- A análise do comportamento empresarial contable
- Establecer comparacións entre as diferentes ramas de actividade
- Establecer comparacións por tamaño da empresa
- Seguir a súa evolución ao longo do tempo
- Contribuír ao coñecemento das relacións, estratexias e fontes de financiamento
A información para a elaboración desta operación procede das contas anuais que as empresas están obrigadas a presentar nos Rexistros Mercantís. O IGE recibe esta información da base de datos Sistema de Análisis de Balances Ibéricos (SABI) a través da empresa Informa.
Investígase ao conxunto das empresas que presentan as súas contas de resultados nos Rexistros Mercantís de Galicia. Quedan fóra da investigación:
- As sociedades mercantís que, tendo actividade en Galicia, teñen a súa sede noutra comunidade autónoma
- As persoas que traballan por conta propia e sociedades non mercantís que non teñen obriga de presentar as contas
- As sociedades mercantís que, aínda tendo a sede en Galicia e estando obrigadas a presentar as contas, non cumpran con esta obriga
A operación estatística Contas das sociedades mercantís de Galicia substitúe a outra operación previa, os Indicadores do sector empresarial. A xustificación desta substitución atópase en que a base de datos que se emprega na elaboración de ambas ampliouse nos últimos anos e agora permite ofrecer a información das contas económicas das sociedades mercantís en valores absolutos, no canto de por medio de indicadores como se fixera ata o momento da substitución.
5 Definicións e máis información
5.1 Definicións
5.2 Máis información
- Contas das sociedades mercantís por actividade económica. Galicia e provincias
- Contas das sociedades mercantís por actividade económica e tamaño. Galicia
- Contas das sociedades mercantís, variación interanual en base homoxénea, por actividade económica. Galicia e provincias
Para realizar as comparacións anuais deste apartado só se teñen en conta as sociedades mercantís que presentaron as súas contas nos Rexistros Mercantís en dous anos consecutivos.↩︎