Contas económicas anuais. Revisión estatística 2024
Datos correspondentes ao ano 2024
28/08/2026
ÍNDICE
descarga en pdf
Principais resultados
No ano 2024, o Produto interior bruto (PIB) de Galicia en termos correntes ascendeu a 81.733,1 millóns de euros e avanzou a un ritmo do 6,1%.
As rendas salariais representaron o 44,4% do PIB e o excedente bruto de explotación o 46,1%.
O sector primario representa o 4,6% do PIB, a construción o 6,0%, o sector industrial e enerxético o 14,7% e os servizos o 65,9%.
Dentro da industria manufactureira, a industria alimentaria representa o 25,4% e a industria da automoción o 19,5%.
1 Introdución
As Contas económicas anuais son unha estatística de síntese de carácter estrutural. O seu obxectivo é ofrecer ao usuario unha representación cuantificada, completa, sistemática, sinxela e detallada da realidade económica galega.
Ofrece información do cadro macroeconómico de Galicia desde o ano 1995 e información desagregada para 72 sectores económicos. Dentro das súas utilidades están:
- Coñecer a estrutura produtiva da economía galega e fornecer de
información útil para a análise da situación económica da rexión.
- Afondar en partes ou aspectos específicos da economía.
- Coñecer a evolución temporal dos sectores económicos que conforman a
nosa economía.
- Os resultados son a base da contabilidade trimestral, das estimacións do produto interior bruto municipal e gardan coherencia coa desagregación e maior alcance do Marco Input-Output. Tamén son a base tanto das previsións económicas como dos estudios sectoriais que se realizan no IGE.
Esta operación estatística segue as liñas metodolóxicas establecidas na Unión Europea polo Regulamento do Sistema Europeo de Contas (SEC 2010).
2 Descomposición do produto interior bruto de Galicia
No ano 2024, o Produto interior bruto (PIB) a prezos correntes ascendeu a 81.733,1 millóns de euros. Con respecto ao 2023, o crecemento porcentual foi do 6,1 %. Esta taxa é 1,8 puntos inferior á rexistrada no 2023.
Fonte: IGE. Contas económicas anuais (descarga da
táboa)
A estimación do PIB pola vía da oferta permite coñecer que sectores produtivos contribúen á xeración de valor engadido en Galicia. No ano 2024, a contribución do sector servizos ao Produto Interior Bruto (PIB) de Galicia foi do 65,9%. Este sector é cada vez máis relevante: pasou do 55,8% do PIB en 1995 ao 65,9% no ano 2024. Esta contribución ao PIB marca o máximo ao longo da serie contable.
O sector industrial e enerxético representa o 14,7%, o sector primario 4,6%, a construción un 6,0% e os impostos netos sobre os produtos un 8,9%.
Fonte: IGE. Contas económicas anuais (descarga da
táboa)
A estimación do PIB pola vía da demanda permite coñecer a contribución da demanda interna (gasto en consumo final e formación bruta de capital –investimentos-) xunto coa demanda exterior neta (diferenza entre exportacións e importacións). O gasto en consumo final, que inclúe tanto o realizado polos fogares como polas Administracións públicas e Institucións sen fin de lucro ao servizo dos fogares (ISFLSF), representa o 80,6% do PIB. O investimento representa o 16,5%. No ano 2024, a demanda externa neta é positiva (as exportacións superan ás importacións).
Fonte: IGE. Contas económicas anuais (descarga da táboa)
Pola vía das rendas, o PIB expresa a remuneración dos factores produtivos: traballo (remuneración de asalariados), capital (excedente de explotación bruto) e o pagamento de impostos. Dentro do excedente de explotación bruto recóllese tamén a renda mixta, que é a remuneración do traballo autónomo.
A remuneración dos asalariados representa o 44,4 % do PIB no ano 2024, o excedente de explotación bruto o 46,1 %, e o restante 9,5 % é o peso dos impostos netos sobre a produción e as importacións ao PIB.
Fonte: IGE. Contas económicas anuais (descarga da
táboa)
3 Desagregación por sectores
As contas económicas anuais ofrecen un alto nivel de detalle sectorial, polo que é posible afondar no coñecemento da economía de Galicia analizando as ramas de actividade.
En termos de actividade, no ano 2024, o 65,9% do PIB da economía galega concéntranse no sector servizos. O sector da industria e enerxía representa o 14,7%, o sector primario o 4,6% e a construción o 6% restante.
En termos de emprego, no ano 2024, o 72,3% dos postos de traballo da economía galega concéntranse no sector servizos. O sector da industria e enerxía representa o 13,1%, o sector primario o 6,9% e a construción o 7,7% restante.
A produtividade do factor traballo, medida como o valor engadido producido por cada hora traballada, é unha medida da produtividade aparente do traballo en termos correntes. Por sectores de actividade a maior produtividade do factor traballo está na industria e enerxía e a menor no sector primario.
A participación das rendas salariais no valor engadido mide a cota de valor engadido utilizada para remunerar o factor traballo asalariado. A construción é o sector que presenta un maior valor da remuneración de asalariados sobre valor engadido (59,2%), é dicir, a participación das rendas salariais na xeración de valor é elevada. En cambio, o sector primario presenta neste indicador un valor inferior á media da economía. Neste sector a presenza do traballo por conta propia é elevada.
| Sector | PIB (miles de € | Distribución do PIB | Emprego (postos de traballo) | Distribución do emprego (postos de traballo) | Produtividade (VEB/Horas efectivas) | Remuneración de asalariados/VEB |
|---|---|---|---|---|---|---|
| Sector primario | 3.734.957 | 4,6 | 81.405 | 6,9 | 22,2 | 20,4 |
| Industria e enerxía | 11.992.286 | 14,7 | 153.300 | 13,1 | 45,8 | 50,3 |
| Construción | 4.938.035 | 6,0 | 90.835 | 7,7 | 31,4 | 59,2 |
| Servizos | 53.828.435 | 65,9 | 848.691 | 72,3 | 39,9 | 49,3 |
| Impostos netos sobre os produtos | 7.239.412 | 8,9 | – | – | – | – |
| Total Economía | 81.733.125 | 100,0 | 1.174.231 | 100,0 | 42,2 | 44,4 |
|
Fonte: IGE. Contas económicas anuais. Descarga das táboas:
distribución do
PIB, distribución do
emprego (–) Non procede |
3.1 Sector primario
As Contas Económicas anuais ofrecen información de catro ramas de actividade dentro do sector primario. Este sector ocupa a 81.405 postos de traballo, dos cales máis da metade son da rama da agricultura e gandaría. Nas ramas da pesca e acuicultura hai 22.792 postos de traballo.
No sector primario, a remuneración de asalariados representa o 20,4% do VEB xerado. Esta porcentaxe é a máis baixa dos catro grandes sectores debido a que a porcentaxe de emprego asalariado sobre emprego total é baixa, especialmente na rama R01 “Agricultura, gandaría, caza e servizos relacionados con ela”. Por outra banda, a produtividade do traballo é inferior á da economía.
| Ramas de actividade | VEB (miles de €) | VEB (% sobre total sector) | EMPREGO (postos de traballo) | EMPREGO (% sobre total sector) | Produtividade (VEB/Horas efectivas) | Remuneración de asalariados/VEB |
|---|---|---|---|---|---|---|
| R01 - Agricultura, gandaría, caza e servizos relacionados con elas | 2.700.377 | 72,3 | 48.430 | 59,5 | 23,5 | 11,7 |
| R02 - Silvicultura e explotacion forestal | 412.795 | 11,1 | 10.183 | 12,5 | 23,2 | 32,5 |
| R03 - Pesca e acuicultura | 621.785 | 16,6 | 22.792 | 28,0 | 17,5 | 50,2 |
| • R03A - Pesca | 437.029 | 11,7 | 17.703 | 21,7 | 16,6 | 59,3 |
| • R03B - Acuicultura | 184.756 | 4,9 | 5.089 | 6,3 | 20,3 | 28,6 |
| TOTAL PRIMARIO | 3.734.957 | 100,0 | 81.405 | 100,0 | 22,2 | 20,4 |
| Fonte: IGE. Contas económicas anuais. (Descarga das táboas) |
Comparando o ano 2024 co inicio da serie contable, ano 2000, vemos como se incrementa a presenza da agricultura e gandaría no sector primario galego en termos de VEB, pero non en termos de emprego. Pola contra, tanto a “Pesca e acuicultura” como a “Silvicultura e explotación forestal” evolucionan de forma oposta: perden peso dentro do sector en termos de VEB pero gáñano en termos de emprego.
Fonte: IGE. Contas económicas anuais (descarga da táboa)
Fonte: IGE. Contas económicas anuais (descarga da táboa)
3.2 Sector industrial
Dentro do sector industrial distinguimos dous grandes bloques: o sector enerxético (que se corresponde coas seccións B, D, E da Clasificación Nacional de Actividades, CNAE-09) e a industria manufactureira. Con respecto á composición interna do sector, en 2024 a distribución enerxía/manufactura do valor engadido bruto sinala un subsector manufactureiro predominante (79,5% do total) e cunha contribución superior á do ano 2000, como se aprecia no gráfico seguinte. En termos de emprego a industria manufactureira é máis relevante: o 90,3% dos empregos do sector secundario proveñen dela.
Fonte: IGE. Contas económicas anuais (descarga da táboa)
Fonte: IGE. Contas económicas anuais (descarga da táboa)
O subsector da industria manufactureira
As Contas económicas anuais desagregan información da industria manufactureira en 26 ramas de actividade diferentes, tal como reflicte a seguinte táboa. Isto permite coñecer o detalle de diversos sectores senlleiros da economía galega, como por exemplo a industria alimentaria, que está formada por seis ramas de actividade: Procesamento e conservación de carne e elaboración de produtos cárnicos; Procesamento e conservación de peixes, crustáceos e moluscos; Fabricación de produtos lácteos; Fabricación de produtos para a alimentación animal; Outras industrias alimentarias e Fabricación de bebidas.
O valor engadido xerado pola industria alimentaria (2.419 millóns de euros) representa o 25,4 % do valor xerado pola industria manufactureira. En termos de emprego, supoñen o 25,7 % e superan os 35 mil postos de traballo.
| Ramas de actividade | VEB (miles de €) | VEB (% sobre total sector) | EMPREGO (postos de traballo) | EMPREGO (% sobre total sector) | Produtividade (VEB/Horas efectivas) | Remuneración de asalariados/VEB |
|---|---|---|---|---|---|---|
| Industria agroalimentaria | 2.418.879 | 25,4 | 35.617 | 25,7 | 39,5 | 48,9 |
| • R10A - Procesamento e conservación de carne e elaboración de produtos cárnicos | 383.018 | 4,0 | 5.008 | 3,6 | 42,3 | 45,2 |
| • R10B - Procesamento e conservación de peixes, crustáceos e moluscos | 650.985 | 6,8 | 11.894 | 8,6 | 32,5 | 59,1 |
| • R10C - Fabricación de produtos lácteos | 289.443 | 3,0 | 2.875 | 2,1 | 55,9 | 36,8 |
| • R10D - Fabricación de produtos para a alimentación animal | 121.112 | 1,3 | 1.716 | 1,2 | 43,1 | 60,1 |
| • R10E - Outras industrias alimentarias | 417.269 | 4,4 | 10.148 | 7,3 | 24,1 | 66,9 |
| • R11 - Fabricación de bebidas | 557.052 | 5,8 | 3.976 | 2,9 | 80,8 | 30,0 |
| R12 - Industria do tabaco | – | – | – | – | – | – |
| R13 - Industria téxtil | 65.256 | 0,7 | 1.667 | 1,2 | 20,1 | 72,7 |
| R14_15 - Industria da confección, do coiro e do calzado | 399.317 | 4,2 | 8.607 | 6,2 | 27,9 | 43,0 |
| R16 - Industria da madeira e da cortiza | 489.652 | 5,1 | 7.773 | 5,6 | 33,1 | 60,6 |
| R17 - Industria do papel | 209.493 | 2,2 | 2.017 | 1,5 | 56,7 | 48,0 |
| R18 - Artes gráficas e reprodución de soportes gravados | 77.887 | 0,8 | 2.294 | 1,7 | 20,7 | 89,4 |
| R19 - Coquerías e refinación de petróleo | 145.321 | 1,5 | 591 | 0,4 | 130,6 | 67,6 |
| R20_21 - Industria química e farmacéutica | 327.221 | 3,4 | 2.924 | 2,1 | 64,1 | 41,9 |
| R22 - Fabricación de produtos de caucho e plásticos | 223.702 | 2,3 | 3.412 | 2,5 | 43,6 | 54,6 |
| R23 - Fabricación doutros produtos minerais non metálicos | 376.272 | 3,9 | 6.413 | 4,6 | 33,7 | 60,6 |
| R24 - Metalurxia; fabricación de produtos de ferro, aceiro e ferroaliaxes | 271.812 | 2,9 | 4.374 | 3,2 | 38,2 | 64,4 |
| R25 - Fabricación de produtos metálicos, agás maquinaria e equipamento | 1.053.697 | 11,1 | 17.701 | 12,8 | 35,8 | 66,2 |
| R26 - Fabricación de produtos informáticos, electrónicos e ópticos | 83.213 | 0,9 | 1.086 | 0,8 | 43,6 | 65,2 |
| R27 - Fabricación de material e equipamento eléctrico | 93.875 | 1,0 | 1.118 | 0,8 | 66,5 | 58,0 |
| R28 - Fabricación de maquinaria e equipamento n.c.n. | 331.798 | 3,5 | 4.751 | 3,4 | 41,5 | 63,2 |
| R29 - Fabricación de vehículos de motor | 1.857.108 | 19,5 | 16.406 | 11,9 | 66,9 | 45,2 |
| R30 - Fabricación doutro material de transporte | 212.456 | 2,2 | 4.463 | 3,2 | 27,5 | 98,7 |
| R31 - Fabricación de mobles | 227.073 | 2,4 | 4.657 | 3,4 | 30,4 | 68,2 |
| R32 - Outras industrias manufactureiras | 85.334 | 0,9 | 1.937 | 1,4 | 24,8 | 62,3 |
| R33 - Reparación e instalación de maquinaria e equipamento | 584.766 | 6,1 | 10.578 | 7,6 | 30,4 | 81,0 |
| INDUSTRIA MANUFACTUREIRA | 9.534.132 | 100,0 | 138.386 | 100,0 | 40,2 | 56,4 |
|
Fonte: IGE. Contas económicas anuais. (Descarga das
táboas) (–) Non procede |
O seguinte gráfico representa, en termos de valor engadido, a participación das seis ramas que forman o subsector da industria alimentaria. En 2024, a contribución da rama da conserva e do conxelado de peixe (R10B) é dun 26,9 % do seu VEB, seguida pola fabricación de bebidas (R11) cun 23,0 % e a rama das outras industrias alimentarias (R10E) cun 17,3 % do VEB.
Fonte: IGE. Contas económicas anuais (descarga da táboa)
Tras a industria alimentaria, a fabricación de vehículos automóbiles é a que ten unha maior contribución ao valor engadido xerado pola industria manufactureira de Galicia. Esta rama de actividade acadou un valor engadido bruto de 1.857 millóns de euros en 2024, o que supón o 19,5% do total da industria manufactureira galega. O emprego nesta rama de actividade é de 16.406 postos de traballo.
Outras industrias relevantes son a fabricación de produtos metálicos (cun VEB de 1.054 millóns de euros); as reparacións e instalación de maquinaria e equipamento (585 millóns de euros, nos que se inclúen os xerados pola reparación naval); a industria da madeira (490 millóns de euros); e a confección de roupa de vestir, coiro e calzado (399 millóns de euros).
No seguinte gráfico represéntase a contribución das diferentes ramas ao VEB da industria manufactureira en dous períodos: 2000 e 2024. A contribución das industrias alimentarias ao VEB industrial manufactureiro incrementouse en 7,6 puntos. A fabricación de vehículos de motor, que en 2000 representaba o 15,4% do VEB da industria manufactureira, representa o 19,5% no 2024.
A “Fabricación de produtos metálicos, agás maquinaria e equipamento” e a “Reparación e instalación de maquinaria e equipamento” representan no ano 2024 un 11,1% e un 6,1% respectivamente, o que supón un incremento da súa relevancia no subsector con respecto ao ano 2000. Tamén presentan un peso no sector industrial superior ao do ano 2000 a industria da madeira, a fabricación de maquinaria, a industria química e farmacéutica ou a fabricación doutro material de transporte.
En cambio, como se aprecia no gráfico, entre as ramas que perderon
peso relativo na industria manufactureira destacamos a “Confección de
roupa de vestir e industria do coiro e do calzado”, a “Fabricación
doutros produtos minerais non metálicos”, a Metalurxia, as “Coquerías e
refinación de petróleo” ou a “Fabricación de material e equipamento
eléctrico”. En todas elas o seu peso dentro VEB da industria diminuíu
con respecto a 2000.
Fonte: IGE. Contas económicas anuais (descarga da táboa)
No seguinte gráfico visualízase a contribución en termos de emprego das distintas ramas da industria manufactureira nos mesmos dous períodos do gráfico anterior. A “Industria alimentaria”, que medrou tanto en termos absolutos como relativos, concentra unha cuarta parte do emprego da industria manufactureira en Galicia no 2024. Repítese o patrón amosado pola contribución ao VEB industrial manufactureiro, porén, hai que mencionar a perda de peso no emprego industrial da “Industria da confección, do coiro e do calzado”, máis pronunciado que no caso do valor engadido. Tamén destacamos a perda de peso da “Industria da madeira e da cortiza”, que en termos de xeración de valor ten un comportamento oposto (con maior peso interno en 2024 que en 2000).
Fonte: IGE. Contas económicas anuais (descarga da
táboa)
3.3 Sector construción
| Ramas de actividade | VEB (miles de €) | VEB (% sobre total sector) | EMPREGO (postos de traballo) | EMPREGO (% sobre total sector) | Produtividade (VEB/Horas efectivas) | Remuneración de asalariados/VEB |
|---|---|---|---|---|---|---|
| R41_43 - Construción | 4.938.035 | 100,0 | 90.835 | 100,0 | 31,4 | 59,2 |
| TOTAL CONSTRUCION | 4.938.035 | 100,0 | 90.835 | 100,0 | 31,4 | 59,2 |
| Fonte: IGE. Contas económicas anuais. (Descarga das táboas) |
No ano 2024, o sector xerou 4.938 millóns de euros con 90.835 postos de traballo, isto é, o 7,7% do emprego total da nosa comunidade. A súa contribución ao PIB (6%) reduciuse 4,3 puntos con respecto ao ano 2000.
Fonte: IGE. Contas económicas anuais. Descarga das táboas (evolución do emprego, evolución do peso no PIB)
3.4 Sector servizos
As Contas económicas de Galicia ofrecen información de 37 ramas de actividade do sector servizos. Estas ramas poden agruparse, seguindo a CNAE-09, en 14 seccións. Na táboa seguinte sintetízanse os principais datos destas seccións en termos de valor engadido, emprego e variables derivadas.
O “Comercio por xunto e ao retallo; reparación de vehículos de motor e motocicletas” xerou en 2024 máis de 9.467 millóns de euros e 186.603 postos de traballo. Representa o 17,6% do valor engadido xerado no sector servizos.
As “Actividades inmobiliarias”, que inclúen a valoración do aluguer das vivendas nas que residen os seus propietarios, representan o 16,0% do VEB xerado no sector servizos, pero ten escasa relevancia en termos de emprego. Isto fai que os niveis de produtividade sexan moi elevados e a participación da renda salarial no valor xerado moi baixa.
As “Actividades sanitarias e de servizos sociais” xeraron 5.322 millóns de euros en 2024, cunha elevada participación das rendas salariais (83,3% do VEB). No caso da “Educación” esta participación é incluso superior (84,6%) ao tratarse dun tipo de sectores intensivos en traballo.
O VEB da “Hostalería” ascendeu a 4.447 millóns de euros (o 8,3 % do valor xerado no sector servizos). Esta sección, que recolle tanto os servizos de aloxamento como os de restauración, ten unha produtividade do traballo inferior á media do sector servizos.
Cómpre sinalar que as actividades de servizos ás empresas, agrupadas nas seccións M e N da CNAE, representan un 10,0 % do valor xerado polo sector terciario de Galicia.
| Ramas de actividade | VEB (miles de €) | VEB (% sobre total sector) | EMPREGO (postos de traballo) | EMPREGO (% sobre total sector) | Produtividade (VEB/Horas efectivas) | Remuneración de asalariados/VEB |
|---|---|---|---|---|---|---|
| G - Comercio por xunto e ao retallo; reparación de vehículos de motor e motocicletas | 9.466.978 | 17,6 | 186.603 | 22,0 | 29,5 | 51,5 |
| H - Transporte e almacenamento | 3.469.938 | 6,4 | 53.980 | 6,4 | 36,9 | 53,0 |
| I - Hostalaría | 4.446.605 | 8,3 | 75.873 | 8,9 | 33,8 | 31,9 |
| J - Información e comunicacións | 2.088.370 | 3,9 | 26.972 | 3,2 | 43,8 | 57,5 |
| K - Actividades financeiras e de seguros | 3.602.173 | 6,7 | 16.614 | 2,0 | 121,4 | 20,1 |
| L - Actividades inmobiliarias | 8.638.169 | 16,0 | 9.851 | 1,2 | 506,4 | 1,8 |
| M - Actividades profesionais, científicas e técnicas | 3.387.301 | 6,3 | 57.762 | 6,8 | 34,2 | 54,6 |
| N - Actividades administrativas e servizos auxiliares | 2.003.642 | 3,7 | 71.051 | 8,4 | 20,2 | 78,5 |
| O - Administración pública e defensa; seguranza social obrigatoria | 4.521.173 | 8,4 | 58.998 | 7,0 | 48,8 | 73,1 |
| P - Educación | 3.918.809 | 7,3 | 72.572 | 8,6 | 40,4 | 84,6 |
| Q - Actividades sanitarias e de servizos sociais | 5.322.123 | 9,9 | 122.229 | 14,4 | 28,8 | 83,3 |
| R - Actividades artísticas, recreativas e de entretemento | 1.195.752 | 2,2 | 24.705 | 2,9 | 35,3 | 58,1 |
| S - Outros servizos | 1.260.505 | 2,3 | 44.459 | 5,2 | 17,4 | 51,9 |
| T - Actividades dos fogares como empregadores de persoal doméstico | 506.897 | 0,9 | 27.022 | 3,2 | 16,6 | 100,0 |
| TOTAL SERVIZOS | 53.828.435 | 100,0 | 848.691 | 100,0 | 39,9 | 49,3 |
| Fonte: IGE. Contas económicas anuais. (Descarga das táboas) |
Do mesmo xeito que no apartado do subsector da industria manufactureira, analizamos, a través de dous gráficos, cal é o cambio relativo do sector servizos galego entre o ano 2000 e o ano 2024.
En termos de VEB, con respecto ao ano 2000, destaca o incremento do peso no sector servizos das “Actividades profesionais, científicas e técnicas” (2,6 puntos porcentuais), das “Actividades inmobiliarias” (2 puntos) e das “Actividades sanitarias e de servizos sociais” (1,7). A “Hostalería”, cuxo peso relativo aumentou 1,7 puntos porcentuais, supera, en termos de contribución á economía, ao sector do transporte ou a educación, ao contrario do que ocorría no ano 2000.
As seccións que máis reduciron o seu peso son o “Comercio e reparación de vehículos” (-2,4 puntos porcentuais) e a sección “Información e comunicacións” (-2,9). A redución nesta sección agocha un comportamento dispar das ramas que a forman: a perda de peso relativo da rama de actividade das “Telecomunicacións” contrasta co comportamento positivo ao longo da serie contable da rama “Programación, consultoría e outras actividades relacionadas coa informática”.
Fonte: IGE. Contas económicas anuais (descarga da táboa)
En termos de emprego, gaña peso especialmente a sección “Actividades sanitarias e de servizos sociais”. O 14,4 % dos postos de traballo no sector servizos pertencen a esta sección. Esta evolución contrasta coa perda de peso da “Administración pública e defensa; seguridade social obrigatoria”. Porén, a sección que rexistrou unha maior perda de peso relativo foi a que recolle as actividades comerciais. A pesar disto, segue a ser a sección da CNAE que concentra un maior porcentaxe de emprego no sector servizos.
Ao igual que ocorría en termos de VEB, as seccións que recollen os servizos a empresas (seccións M e N) incrementan a súa cota de emprego no sector servizos. Pola contra, pérdeno a educación, ou o transporte.
Fonte: IGE. Contas económicas anuais (descarga da táboa)
4 Sectores característicos da economía galega
No IGE elaboramos desde o ano 2013 estudos referidos a diversos sectores da economía galega, incluídos nos programas estatísticos anuais na actividade de interese estatístico “Análise estatística de sectores produtivos e da estrutura económica en xeral”. Na seguinte táboa resumimos a evolución da súa contribución ao PIB galego e a súa relevancia en termos de emprego1.
| Sectores | 2000 | 2008 | 2024 |
|---|---|---|---|
| Cadea forestal-madeira | 2,4 | 1,9 | 1,6 |
| Fabricación de vehículos e compoñentes | 2,1 | 1,9 | 2,3 |
| Ramas características do sector cultural | .. | 2,2 | 2,1 |
| Sector agroalimentario | 7,5 | 6,2 | 7,0 |
| Sector da minaría e fabricación de produtos minerais non metálicos | 1,8 | 1,3 | 0,7 |
| Sector da pesca | 2,4 | 1,7 | 1,6 |
| Sector do transporte e da loxística | 4,3 | 3,9 | 4,2 |
|
Fonte: IGE. Contas económicas anuais. (Descarga da
táboa) (..) Non dispoñible |
| Sectores | 2000 | 2008 | 2024 |
|---|---|---|---|
| Cadea forestal-madeira | 28.932 | 27.115 | 24.630 |
| Fabricación de vehículos e compoñentes | 18.782 | 20.579 | 16.406 |
| Ramas características do sector cultural | .. | 29.956 | 35.763 |
| Sector agroalimentario | 190.156 | 120.167 | 106.839 |
| Sector da minaría e fabricación de produtos minerais non metálicos | 20.343 | 20.509 | 10.581 |
| Sector da pesca | 42.312 | 35.058 | 34.686 |
| Sector do transporte e da loxística | 44.537 | 55.667 | 53.980 |
|
Fonte: IGE. Contas económicas anuais. (Descarga da
táboa) (..) Non dispoñible |