Conta Satélite do Deporte. Revisión estatística 2024
Datos correspondentes ao ano 2023
31/10/2025
descarga en pdf
Principais resultados
No ano 2023, o valor engadido xerado polo sector do deporte medrou un 12% con respecto ao ano anterior.
A contribución do sector do deporte ao Produto interior bruto de Galicia sitúase no 0,9%.
En termos emprego, o sector é responsable directo de 17.248 postos de traballo, o que representa o 1,5% do emprego da economía galega.
1 Introdución
A Conta Satélite do Deporte é unha actividade estatística de síntese destinada a medir a dimensión económica do sector do deporte en Galicia e a súa contribución á economía galega. Este proxecto xurdiu a iniciativa da Secretaría Xeral do Deporte (Consellería de Presidencia, Xustiza e Deportes), que solicitou ao IGE a cuantificación da dimensión económica do sector.
As contas satélite permiten afondar no coñecemento dun determinado aspecto da economía, ampliando a información do sistema de contas económicas. No eido do deporte, no que existe información dispersa tanto de tipo económica como doutro tipo, unha conta satélite axuda a sintetizar toda esta información.
A definición estatística do sector do deporte non está regulada en Europa, aínda que se toma como referencia a Clasificación de Vilnius, baseada en estándares estatísticos. Porén, a viabilidade da estimación dos agregados económicos consonte a esta definición está constrinxida pola dispoñibilidade de fontes. Por este motivo, o sector do deporte definido na Conta Satélite do Deporte de Galicia utiliza esta clasificación restrinxíndoa aos produtos e servizos característicos do deporte, é dicir, aqueles que non existirían de non ser por el.
Esta publicación ofrece resultados da conta de produción, explotación e emprego do sector do deporte correspondentes ao período 2021-2023, en coherencia co Sistema de Contas Económicas de Galicia (Revisión estatística 2024).
2 A contribución do sector do deporte á economía galega
No ano 2023, o valor engadido bruto xerado polo sector do deporte en Galicia ascendeu a 694.561 miles de euros, o que representa o 0,9% do Produto Interior Bruto xerado na Comunidade autónoma en dito período. Con respecto a 2022, o valor xerado a prezos correntes polo sector medrou a unha taxa do 12%.
| Operación | Dato | Peso na economía (%) |
|---|---|---|
| P.1 Produción a prezos básicos | 1.225.545 | 0,8 |
| P.2 Consumos intermedios | 530.984 | 0,6 |
| B.1 Valor engadido bruto | 694.561 | 0,9 |
| D.1 Remuneración de asalariados | 555.774 | 1,6 |
| D.11 Soldos e salarios | 458.066 | 1,7 |
| D.12 Cotizacións sociais | 97.708 | 1,3 |
| D.29-D.39 Outros impostos sobre a produción netos de subvencións | -9.208 | -2,3 |
| B.2 Excedente bruto de explotación / Renda mixta | 147.995 | 0,4 |
|
Fonte: IGE. Conta Satélite do Deporte. (Descarga da
táboa). |
En termos de emprego, o sector é responsable directo de 17.248 postos de traballo, que representan o 1,5% do total do emprego da economía galega. A meirande parte do emprego é asalariado, cuxa remuneración alcanzou os 555.774 miles de euros. Esta masa salarial representa o 1,6% da Remuneración de asalariados total da economía galega.
| Operación | Dato | Peso na economía (%) |
|---|---|---|
| Postos de traballo | 17.248 | 1,5 |
| Postos de traballo equivalentes a tempo completo | 13.514 | 1,3 |
|
Fonte: IGE. Conta Satélite do Deporte. (Descarga da
táboa). |