Altas, baixas e permanencia temporal das
afiliacións
ao Sistema da Seguridade Social en Galicia
Datos correspondentes a 2024
Resumo de resultados 05/12/2025
descarga en pdf
Principais resultados
No ano 2024, preto do 60% das persoas afiliadas á Seguridade Social traballaron durante todo o ano
As persoas afiliadas rexistraron unha media de 2 afiliacións no ano 2024, cunha duración media de 164,3 días por afiliación.
Os homes presentan períodos de afiliación máis longos (175,1 días) que as mulleres (154,6 días).
Un 24,4% das afiliacións que se deron de alta no ano 2024 continuaron activas a finais de ano.
1. Introdución
O mercado laboral cambia con rapidez, con novas profesións e transformación das tarefas tradicionais. Neste contexto, as traxectorias laborais son máis complexas e as estatísticas deben adaptarse para reflectir esta realidade.
O Instituto Galego de Estatística (IGE) busca complementar os seus datos con indicadores sobre a duración e evolución das afiliacións á Seguridade Social, aproveitando os ficheiros de afiliacións, contas e bases de cotización que ata o de agora se analizaban só de forma transversal.
É importante aclarar que o número de afiliacións non representa directamente o número de persoas traballadoras, senón as diferentes situacións laborais que requiren cotizar á Seguridade Social. Por exemplo, unha mesma persoa pode ter varias afiliacións se traballa en diferentes empregos ou cotiza en varios réximes ao mesmo tempo.
A actividade Análise lonxitudinal das afiliacións ao Sistema da Seguridade Social en Galicia, elaborada por primeira vez polo IGE, ten como obxectivo ofrecer unha visión lonxitudinal das afiliacións. Estúdanse o número e a duración media dos períodos de afiliación, entendidos como períodos de tempo que transcurre entre a data de alta e a data de baixa, ambas incluidas, na que o traballador permanece en situación de alta sen que cambien as características da afiliación. Por exemplo, unha afiliación coas mesmas características que é dada de baixa 3 veces, daría lugar a tres períodos de afiliación. No caso de afiliacións que son dadas de baixa no día x e de alta de novo no día x+1, sen que cambien as características da afiliación, non dá lugar a un novo periodo de afiliación; considérase que esa baixa non sucedeu.
Tamén se estuda a intensidade do traballo, definida como a proporción de días que unha persoa está inscrita en alta laboral á Seguridade Social no ano en estudo. En outras palabras, mide que tan presente está a persoa no mercado laboral durante o ano. Se unha persoa traballa todo o ano, a súa intensidade de traballo será do 100%, mentres que se só traballa uns meses, será unha proporción menor.
Por último, analízase a permanencia temporal das afiliacións dadas de alta no ano de estudo, definida como a proporción de afiliacións que seguen en alta a último día hábil do período de seguimento, en relación a todas as afililiacións que se deron de alta no ano en estudo.
Este traballo fai referencia ás persoas afiliadas que residen e traballan en Galicia.
1. Clasificación das persoas segundo a proporción de días inscritos en alta laboral
Neste apartado estúdanse as persoas segundo a proporción de días inscritos en alta laboral á Seguridade Social no ano 2024, que tamén denominamos intensidade do traballo. Ao longo do ano 2024, 1.163.908 persoas que residen e traballan en Galicia estiveron dadas de alta nalgún momento. Na seguinte táboa pódese observar que o 59,7% destas persoas traballaron todo o ano en Galicia, mentres que o 9,9% traballaron menos da cuarta parte do ano, o que suxire a presenza de empregos de curta duración ou de baixa intensidade temporal.
| Proporcion de días en alta laboral | Persoas en alta laboral | Porcentaxe |
|---|---|---|
| De 0 a 25% | 114.943 | 9,9 |
| De 25% a 50% | 91.444 | 7,9 |
| De 50% a 75% | 116.598 | 10,0 |
| De 75% a 99% | 146.428 | 12,6 |
| 100% | 694.495 | 59,7 |
| Total | 1.163.908 | 100,0 |
| Fonte: IGE.Análise lonxitudinal das afiliacións ao Sistema da Seguridade Social en Galicia (descarga da táboa). |
No gráfico seguinte móstrase a mesma información da táboa anterior, pero neste caso desagregada por idade e sexo. Se sumamos todo o tempo traballado por homes e mulleres durante o ano, observarmos que as mulleres teñen traballos de menos duración.
Persoas segundo a proporción de días inscritos á Seguridade Social no ano. Galicia. Ano 2024
Unidade: porcentaxe
Fonte: IGE.Análise lonxitudinal das afiliacións ao Sistema da Seguridade Social en Galicia.
3. Número e duración media dos períodos de afiliación
Ao longo do ano 2024 as persoas tiveron de media 2 afiliacións, e cada afiliación durou de media 164,3 días. O número medio de afiliacións foi parecido entre os homes e mulleres, pero a duración media foi maior nos homes (175,1 días) que nas mulleres (154,6 días). Tamén se observa que a medida que pasan os anos a duración media dos períodos de afiliación vai aumentando, pasando de 159,7 días no ano 2022 a 164,3 no ano 2024.
| Sexo | Tempo | Número medio de afiliacións por persoa | Duración media dos períodos de afiliación |
|---|---|---|---|
| Total | 2022 | 2,1 | 159,7 |
| Total | 2023 | 2,0 | 162,1 |
| Total | 2024 | 2,0 | 164,3 |
| Homes | 2022 | 1,9 | 171,3 |
| Homes | 2023 | 1,9 | 173,3 |
| Homes | 2024 | 1,9 | 175,1 |
| Mulleres | 2022 | 2,2 | 149,4 |
| Mulleres | 2023 | 2,2 | 152,2 |
| Mulleres | 2024 | 2,1 | 154,6 |
| Fonte: IGE.Análise lonxitudinal das afiliacións ao Sistema da Seguridade Social en Galicia (descarga da táboa). |
Na seguinte táboa analizamos o número medio de afiliacións por persoa, segundo idade, para o ano 2024. Pódese observar que a medida que aumenta a idade diminúe o número de afiliacións, pasando de 3 afiliacións nos menores de 25 anos a 1,4 nas persoas de 60 e máis anos. Polo que respecta á duración media dos períodos de afiliación increméntase coa idade: pasa de 67,6 días nos menores de 25 anos a 234,3 días nas persoas de 60 e máis anos.
| Grupo de idade | Número medio de afiliacións por persoa | Duración media dos períodos de afiliación |
|---|---|---|
| Total | 2,0 | 164,3 |
| Menores de 25 anos | 3,0 | 67,6 |
| Entre 25 e 29 anos | 2,8 | 107,5 |
| Entre 30 e 34 anos | 2,4 | 135,5 |
| Entre 35 e 39 anos | 2,1 | 156,4 |
| Entre 40 e 44 anos | 2,0 | 174,2 |
| Entre 45 e 49 anos | 1,9 | 188,1 |
| Entre 50 e 54 anos | 1,8 | 200,5 |
| Entre 55 e 59 anos | 1,6 | 215,6 |
| 60 anos ou máis | 1,4 | 234,3 |
| Fonte: IGE.Análise lonxitudinal das afiliacións ao Sistema da Seguridade Social en Galicia (descarga da táboa). |
Por sector económico, observamos que o maior número medio de afiliacións por persoa corresponde ao sector servizos (2,2). Pola contra, o sector da construción presenta o menor número medio, con 1,2 afiliacións. En canto á duración media, os períodos máis longos rexístranse no sector da construción, con 258,8 días de media, mentres que os máis curtos aparecen no sector servizos, con 146,8 días.
| Sector de actividade | Número medio de afiliacións por persoa | Duración media dos períodos de afiliación |
|---|---|---|
| Total | 2,0 | 164,3 |
| Agricultura | 1,3 | 236,7 |
| Construción | 1,2 | 258,8 |
| Industria | 1,3 | 237,5 |
| Servizos | 2,2 | 146,8 |
| Non consta | 1,0 | 321,7 |
| Fonte: IGE.Análise lonxitudinal das afiliacións ao Sistema da Seguridade Social en Galicia (descarga da táboa). |
4. Permanencia temporal das afiliacións que se deron de alta
Nesta sección analizamos a permanencia temporal das afiliacións, que se refire á proporción de afiliacións que seguen activas ao final de cada ano. Neste caso séguese a afiliación durante todo o período de seguimento e compróbase se segue de alta ou se xa se deu de baixa. Como a serie comeza no ano 2022, pode calcularse a permanencia ao primeiro ano (Ano 0), no segundo ano (Ano 1) e no terceiro ano (Ano 2). Así, no ano 2022 déronse de alta ao longo do ano 1.355.494 afiliacións, das cales o 22,5% seguían en alta a finais do ano 2022, o 9,9% seguían de alta a finais do ano 2023 e o 7,2% continuaban en alta a finais do ano 2024.
|
Afiliacións
|
Porcentaxe de permanencia
|
|||||||
|---|---|---|---|---|---|---|---|---|
| Ano de alta | Altas | Seguen de alta a finais do Ano 0 | Seguen de alta a finais do Ano 1 | Seguen de alta a finais do Ano 2 | Altas | Seguen de alta a finais do Ano 0 | Seguen de alta a finais do Ano 1 | Seguen de alta a finais do Ano 2 |
| 2022 | 1.355.494 | 304.980 | 134.792 | 97.176 | 100 | 22,5 | 9,9 | 7,2 |
| 2023 | 1.346.253 | 321.527 | 155.986 | - | 100 | 23,9 | 11,6 | - |
| 2024 | 1.310.890 | 320.443 | - | - | 100 | 24,4 | - | - |
|
Fonte: IGE.Análise lonxitudinal das afiliacións ao Sistema
da Seguridade Social en Galicia (descarga da
táboa). Nota: Na duración das afiliacións, Ano 0 fai referencia ao último día do ano en estudo, Ano 1 ao último día do ano seguinte e Ano 2 ao último día do segundo ano. |
||||||||