ÍNDICE


Principais resultados

Introdución

A Enquisa sobre vacantes nas empresas galegas, grao de utilización da capacidade produtiva e indicador de sentimento do sector servizos de Galicia é unha operación estatística na que se enmarcan tres estudos:


Vacantes nas empresas galegas


Unha vacante de emprego1 refírese a un posto de traballo remunerado, creado recentemente, que non está ocupado, ou que está a punto de quedar libre, para o cal o empregador:

  1. está tomando e preparando medidas activas co obxecto de atopar un candidato idóneo alleo á empresa en cuestión, e
  2. ten a intención de cubrilo de forma inmediata ou nun prazo de tempo determinado.

No primeiro trimestre de 2025 había en Galicia 11.385 vacantes nas empresas de 10 ou máis asalariados. O número de vacantes incrementouse en 26 con respecto do mesmo trimestre do ano 2024 (11.359).

No primeiro trimestre de 2025, o 25,2% das vacantes requirían titulación STEM2. Esta porcentaxe baixa con respecto ao mesmo trimestre do ano anterior, no que o 28,7% das vacantes requirían titulación STEM.

Número de vacantes nas empresas de 10 ou máis asalariados. Galicia.
Unidade: número
2024/I 2024/II 2024/III 2024/IV 2025/I TAXA DE VARIACIÓN INTERANUAL DO 2025/I
VACANTES 11.359 11.962 13.586 12.728 11.385 0,23
VACANTES STEM 3.258 2.733 3.568 3.548 2.871 -11,88
Fonte: IGE. Enquisa sobre vacantes nas empresas galegas (descarga da táboa)

  Tal e como se reflexa no seguinte gráfico, o maior número de vacantes en Galicia rexístrase nas empresas que teñen entre 10 e 49 asalariados.

  O principal motivo polo que as empresas non tiñan vacantes foi “Non se necesita ningunha persoa máis”, que superou o 85% no primeiro trimestre de 2025.

 

No primeiro trimestre de 2025 o 20,2% das empresas con vacantes aínda tiñan sen cubrir as do trimestre anterior. No mesmo trimestre do ano anterior esta porcentaxe foi do 25,1%.

O motivo máis indicado como causante de non ter cubertas as vacantes foi, como en trimestres anteriores, a falta de persoas con formación axeitada, sen ter en conta a formación STEM e a capacitación dixital; esta porcentaxe foi de 36,5% no primeiro trimestre do ano 2025.

Motivos polos que as empresas con vacantes non puideron cubrilas. Galicia.
Unidade: porcentaxes
Motivos 2024/I 2024/II 2024/III 2024/IV 2025/I
Falta de persoas candidatas con titulación superior STEM 18,45 20,51 22,54 21,13 22,97
Falta de persoas candidatas con preparación dixital suficiente 6,80 10,26 8,45 5,63 12,16
Falta de persoas candidatas con formación axeitada non incluída nos dous anteriores 38,83 42,31 38,03 35,21 36,49
As persoas candidatas non consideraron axeitadas as condicións económicas 16,50 15,38 12,68 15,49 14,86
As persoas candidatas non consideraron idóneas outras circunstancias do posto 24,27 19,23 11,27 22,54 24,32
Outros 33,01 37,18 42,25 40,85 31,08
Fonte: IGE. Enquisa sobre vacantes nas empresas galegas (descarga da táboa)


Utilización da capacidade produtiva das empresas galegas do sector servizos


No primeiro trimestre de 2025, o 58,7% das empresas empregan as súas instalacións, maquinaria e/ou equipamento máis do 75%. Esta porcentaxe diminuíu con respecto do mesmo trimestre do ano anterior que era do 59,8%.

Grao de utilización das instalacións, maquinaria e/ou equipamento. Galicia.
Unidade: porcentaxes
2024/I 2024/II 2024/III 2024/IV 2025/I
Menos do 25% 5,85 5,67 4,69 5,76 7,14
Entre o 25% e 50% 14,89 11,86 8,07 8,38 9,79
Entre 50% e 75% 19,41 19,33 25,52 23,56 24,34
Máis do 75% 59,84 63,14 61,72 62,30 58,73
Fonte: IGE. Enquisa sobre vacantes nas empresas galegas (descarga da táboa)

No que respecta ao grao de ocupación do persoal, no primeiro trimestre de 2025, o 65,3% das empresas empregan ao seu persoal máis do 75%.

Grao de ocupación do persoal. Galicia.
Unidade: porcentaxes
2024/I 2024/II 2024/III 2024/IV 2025/I
Menos do 25% 5,05 2,58 3,39 4,19 5,29
Entre o 25% e 50% 7,45 7,73 7,81 6,81 7,67
Entre 50% e 75% 15,96 18,56 15,89 16,75 21,69
Máis do 75% 71,54 71,13 72,92 72,25 65,34
Fonte: IGE. Enquisa sobre vacantes nas empresas galegas (descarga da táboa)

Indicador de sentimento harmonizado do sector servizos

Calculando a diferencia entre a porcentaxe de empresas con resposta favorable e a porcentaxe de empresas con resposta desfavorable nos items do indicador de sentimento económico para o sector servizos (economic sentiment indicator for the services sector ou ESI.SERV) calcúlanse os seguintes indicadores:

Indicador de sentimento harmonizado do sector servizos (balance). Galicia.
Unidade: porcentaxes
2024/I 2024/II 2024/III 2024/IV 2025/I
Percepción da situación empresarial no trimestre en curso 2,90 7,51 11,83 13,35 7,64
Percepción da evolución da demanda de servizos no trimestre en curso 0,57 14,33 12,51 14,25 8,21
Previsión da evolución da demanda no próximo trimestre 20,13 20,46 18,51 18,71 25,34
Fonte: IGE. Enquisa sobre vacantes nas empresas galegas (descarga da táboa)

A percepción da situación empresarial no sector servizos mantense en valores positivos nos cinco últimos trimestres. O mesmo ocorre coa percepción da evolución da demanda de servizos. É dicir, segundo reflicten os datos a situación empresarial do sector servizos é boa.

A previsión da evolución da demanda para o próximo trimestre acada o valor 25,3% . Este valor positivo segue a senda do ano 2024, no que este indicador acadou valores positivos nos catro trimestres.

  1. Segundo a definición do Regulamento (CE) No 453/2008 do Parlamento Europeo e do Consello de 23 de abril de 2008 relativo ás estatísticas trimestrais sobre vacantes de emprego na Comunidade)
    ↩︎

  2. STEM é un acrónimo dos termos en inglés Science, Technology, Engineering and Mathematics (Ciencia, Tecnoloxía, Enxeñaría e Matemáticas).
    ↩︎