Contas económicas trimestrais de Galicia. Revisión Estatística 2024
Datos correspondentes ao cuarto trimestre de 2025
Data de publicación: 27/02/2026
descarga en pdf
Principais resultados
O ritmo de crecemento da economía galega acada o 2,6% no ano 2025.
A contribución da demanda interna ao crecemento foi de 2,4 puntos porcentuais, mentres que a demanda externa xera unha aportación positiva ao crecemento de 0,2 puntos.
Os postos de traballo equivalentes e as horas traballadas aumentaron un 1% no conxunto do ano.
O ritmo de crecemento interanual do PIB no último trimestre do ano foi do 2,4%.
Evolución anual do PIB. Volume encadeado referencia ano 2020=100
Unidade: porcentaxe
Fonte: IGE. Contas económicas trimestrais (descarga da táboa).
1 Produto interior bruto. Ano 2025
No conxunto do 2025 o Produto Interior Bruto (PIB) en termos de volume medrou un 2,6% con respecto ao ano 2024.
Desde a óptica da demanda, o crecemento do PIB estivo sustentado fundamentalmente pola demanda interna, que contribúe ao crecemento en 2,4 puntos porcentuais. Neste comportamento destaca especialmente o notable incremento da formación bruta de capital, que medrou un 4,2% con respecto ao rexistrado no ano anterior. Pola súa banda, o consumo privado aumentou un 2%, tamén cun ritmo superior ao do exercicio precedente, mentres que o consumo das administracións públicas moderou o seu crecemento ata o 2,3%, situándose por debaixo da taxa de 2024.
A demanda externa mantivo unha contribución positiva ao crecemento, achegando 0,2 puntos porcentuais ao crecemento do PIB. Este resultado prodúcese nun contexto no que as exportacións de bens e servizos se mantiveron estables (0%), ao tempo que as importacións diminuíron un 0,3%.
Compoñentes do PIB pola vía da demanda. Volume encadeado referencia ano 2020=100. Taxas de variación anual
Unidade: porcentaxe
Fonte: IGE. Contas económicas trimestrais (descarga da táboa).
Desde a óptica da oferta, a construción amosa un notable dinamismo no conxunto de 2025, cunha taxa de variación do Valor Engadido Bruto (VEB) do 7,3 %. Asemade, o VEB da industria medra un 2,2 % e o do sector servizos un 2,7 %. As ramas primarias rexistran un incremento máis moderado, cunha taxa de variación do 1,3 %.
Compoñentes do PIB pola vía da oferta. Volume encadeado referencia ano 2020=100. Taxas de variación anual
Unidade: porcentaxe
Fonte: IGE. Contas económicas trimestrais (descarga da táboa).
O valor do PIB a prezos correntes acada os 86.001 millóns de euros, un 5,7% superior ao de 2024.
Pola súa parte, o deflactor implícito do PIB crece un 3,0%, dúas décimas máis que no ano anterior.
En relación ao emprego, tanto os postos de traballo equivalentes a tempo completo como as horas traballadas aumentan un 1% no conxunto do ano 2025.
Considerando o crecemento do PIB e o do emprego en 2025, a produtividade aparente real por posto de traballo equivalente a tempo completo aumenta un 1,5% neste ano, tres décimas máis que no ano anterior. Pola súa parte, a produtividade por hora traballada aumenta un 1,6%, tres décimas menos que en 2024.
2 Produto Interior Bruto. Cuarto trimestre de 2025
No cuarto trimestre do 2025, o Produto Interior Bruto (PIB) xerado pola economía galega, medido en termos de volume encadeado e con datos corrixidos de efectos estacionais e de calendario, rexistra unha variación intertrimestral do 0,7% e unha variación interanual do 2,4%.
| Dato | 2024/I | 2024/II | 2024/III | 2024/IV | 2025/I | 2025/II | 2025/III | 2025/IV |
|---|---|---|---|---|---|---|---|---|
| Taxa de variación trimestre anterior | 0,7 | 0,7 | 0,9 | 0,6 | 0,7 | 0,4 | 0,5 | 0,7 |
| Taxa de variación interanual | 2,3 | 3,0 | 3,3 | 2,8 | 2,9 | 2,6 | 2,2 | 2,4 |
| Fonte: IGE. Contas económicas trimestrais (descarga da táboa). |
PIB. Taxas de variación interanual
Unidade: porcentaxe
Fonte: IGE. Contas económicas trimestrais (descarga da táboa).
No cuarto trimestre, a demanda interna contribuíu con 2 puntos porcentuais ao crecemento interanual do PIB galego, catro décimas menos que no trimestre anterior. Por outra banda, a contribución da demanda externa ao crecemento é positiva (0,4 puntos) frente á contribución negativa (-0,2 puntos) do trimestre precedente.
Evolución do PIB en volume e contribucións da demanda interna e da demanda externa
Unidade: taxas de variación en porcentaxe e contribucións en puntos porcentuais
Fonte: IGE. Contas económicas trimestrais (descarga da táboa).
Dentro da demanda interna, o gasto en consumo final dos fogares e ISFLSF crece máis que no trimestre anterior (2,1% fronte a 1,6%), mentres que se modera o avance do consumo público (ata o 0,9%) e o da formación bruta de capital (ata o 3,3%) .
En relación ao sector exterior, diminúen tanto as exportacións como as importacións. As exportacións de bens e servizos presentan unha taxa interanual do -2,3%, e as importacións do -3,1%.
| Compoñentes | 2024/I | 2024/II | 2024/III | 2024/IV | 2025/I | 2025/II | 2025/III | 2025/IV |
|---|---|---|---|---|---|---|---|---|
| Gasto en consumo final | 3,9 | 1,7 | 2,4 | 2,8 | 1,7 | 2,7 | 2,1 | 1,8 |
| Gasto dos fogares e ISFLSF | 2,7 | 0,5 | 1,6 | 1,8 | 1,3 | 2,9 | 1,6 | 2,1 |
| Gastos das AA.PP. | 7,1 | 5,4 | 5,0 | 5,8 | 2,7 | 2,3 | 3,3 | 0,9 |
| Formación bruta de capital | -0,5 | -1,0 | 2,4 | 4,4 | 2,7 | 6,6 | 4,4 | 3,3 |
| Demanda interna (en termos nacionais) (*) | 3,0 | 1,2 | 2,4 | 3,1 | 1,8 | 3,3 | 2,4 | 2,0 |
| Exportación de bens e servizos | 1,1 | 4,6 | 3,8 | 3,0 | 1,2 | -1,2 | 2,2 | -2,3 |
| Importación de bens e servizos | 2,5 | 1,7 | 2,3 | 3,5 | -0,7 | -0,1 | 2,6 | -3,1 |
|
Fonte: IGE. Contas económicas trimestrais (descarga
da táboa). Nota: (*) Contribución ao crecemento do PIB. |
No que respecta á oferta, aumenta o VEB de todos os grandes sectores de actividade. O maior incremento rexístrase na construción, cunha taxa do 9,3%. Pola súa parte, o VEB das ramas primarias presenta unha taxa de variación interanual do 1,2%, o VEB da industria medra un 1,5% e o VEB do sector servizos un 2,5%.
| Compoñentes | 2024/I | 2024/II | 2024/III | 2024/IV | 2025/I | 2025/II | 2025/III | 2025/IV |
|---|---|---|---|---|---|---|---|---|
| VEB. Agricultura, gandaría, silvicultura e pesca | 4,5 | 4,2 | 1,4 | 2,6 | 3,0 | 0,0 | 0,9 | 1,2 |
| VEB. Industria | 4,3 | 4,2 | 5,0 | -0,3 | 1,5 | 2,4 | 3,4 | 1,5 |
| VEB. Construción | 3,3 | 5,3 | 4,5 | 6,0 | 5,2 | 6,4 | 8,4 | 9,3 |
| VEB. Servizos | 1,6 | 2,7 | 3,2 | 3,6 | 3,3 | 2,9 | 1,9 | 2,5 |
| Impostos netos sobre os produtos | 0,9 | -0,1 | 0,7 | 0,9 | 0,9 | -0,1 | -1,4 | -1,0 |
| Fonte: IGE. Contas económicas trimestrais (descarga da táboa). |
No cuarto trimestre do 2025, o PIB valorado a prezos correntes e con datos corrixidos de efectos estacionais e de calendario, rexistra unha variación interanual do 6,2%, sendo esta variación 1,2 puntos maior á rexistrada no trimestre precedente.
Pola súa parte, o deflactor implícito do PIB medrou un 3,6% neste trimestre.
Os postos de traballo equivalentes a tempo completo rexistran un crecemento interanual do 1,2%, 0,1 puntos superior ao do trimestre anterior.
| Dato | 2024/I | 2024/II | 2024/III | 2024/IV | 2025/I | 2025/II | 2025/III | 2025/IV |
|---|---|---|---|---|---|---|---|---|
| Postos de traballo equivalentes a tempo completo | 2,1 | 1,5 | 1,3 | 1,4 | 0,7 | 1,0 | 1,1 | 1,2 |
| Horas traballadas | 2,2 | 0,5 | 0,4 | 0,8 | 0,0 | 0,8 | 1,4 | 1,6 |
| Fonte: IGE. Contas económicas trimestrais (descarga da táboa). |
As horas traballadas aumentan un 1,6% en taxa interanual no cuarto trimestre (1,4% no trimestre anterior).
Considerando de forma conxunta o crecemento do PIB trimestral e o do emprego, a produtividade aparente real por posto de traballo equivalente a tempo completo medrou un 1,2% neste trimestre, mentres que a produtividade por hora traballada incrementouse un 0,8%.
3 Notas metodolóxicas
As Contas económicas trimestrais son unha estatística de síntese de carácter conxuntural. O seu obxectivo primordial é proporcionar unha descrición cuantitativa e coherente do conxunto da actividade económica galega. Con esta finalidade, elabórase un cadro macroeconómico que ofrece o ritmo de crecemento do PIB galego e das súas compoñentes.
Esta actividade é unha réplica trimestral simplificada das Contas económicas anuais que, pola súa maior frecuencia de elaboración, permite o seguimento conxuntural da actividade económica. Estas estimacións axústanse aos mesmos principios de coherencia e equilibrio contable que as contas de frecuencia anual e, por conseguinte, ao marco do Sistema Europeo de Contas 2010 (SEC-2010). Pódese dicir que as Contas económicas trimestrais supoñen un compromiso entre o rigor e a amplitude das Contas anuais e a rapidez e oportunidade dos indicadores conxunturais.
As utilidades concretas das Contas económicas trimestrais de Galicia son as seguintes:
Medir a evolución da economía no tempo de forma continua e coherente.
Incrementar a calidade do sistema estatístico conxuntural.
Dado o seu carácter sintético e integrador, identifica carencias, suxire cambios e propón un marco de referencia común, susceptible de utilización por estatísticas dispares.
Permite estimar modelos econométricos trimestrais, útiles na análise de políticas económicas e na previsión.