Contas económicas trimestrais de Galicia. Revisión Estatística 2024
Datos correspondentes ao segundo trimestre de 2025
Data de publicación: 29/08/2025
descarga en pdf
Principais resultados
O PIB rexistrou unha variación interanual do 2,5%, tres décimas inferior á rexistrada no trimestre anterior.
A variación intertrimestral do PIB foi do 0,5%. Esta taxa foi unha décima inferior á do primeiro trimestre.
Os postos de traballo equivalentes a tempo completo aumentaron un 1,4% en taxa interanual. As horas traballadas creceron un 0,4%.
1 Produto Interior Bruto en volume
O Produto Interior Bruto (PIB) xerado pola economía galega, medido en termos de volume encadeado e con datos corrixidos de efectos estacionais e de calendario, rexistra unha variación interanual do 2,5% no segundo trimestre do 2025.
A variación intertrimestral do PIB sitúase no 0,5% (0,6% no trimestre anterior).
| Dato | 2024/I | 2024/II | 2024/III | 2024/IV | 2025/I | 2025/II |
|---|---|---|---|---|---|---|
| Taxa de variación trimestre anterior | 0,7 | 0,7 | 0,8 | 0,6 | 0,6 | 0,5 |
| Taxa de variación interanual | 2,3 | 3,0 | 3,2 | 2,8 | 2,8 | 2,5 |
| Fonte: IGE. Contas económicas trimestrais (descarga da táboa) |
PIB. Taxas de variación interanual
Unidade: porcentaxe
PIB. Taxas de variación intertrimestral
Unidade: porcentaxe
Fonte: IGE. Contas económicas trimestrais (descarga da táboa)
A demanda interna contribuíu con 2,2 puntos porcentuais ao crecemento interanual do PIB galego. A aportación da demanda externa foi de 0,3 puntos porcentuais.
Evolución do PIB en volume e contribucións da demanda interna e da demanda externa
Unidade: taxas de variación en porcentaxe e contribucións en puntos porcentuais
Fonte: IGE. Contas económicas trimestrais (descarga da táboa)
No segundo trimestre do 2025, o gasto en consumo final dos fogares aumenta un 1,7%, máis que no trimestre anterior (0,3%). O gasto das Administracións públicas medra un 1,7%, o mesmo que no trimestre anterior.
Por outra banda, a formación bruta de capital experimenta un incremento de 3,3 puntos con respecto ao trimestre precedente, acadando un crecemento interanual do 4,8%.
As exportacións de bens e servizos presentan unha taxa interanual do -1,2% e as importacións do -2%.
| Compoñentes | 2024/I | 2024/II | 2024/III | 2024/IV | 2025/I | 2025/II |
|---|---|---|---|---|---|---|
| Gasto en consumo final | 3,9 | 2,0 | 2,6 | 2,4 | 0,7 | 1,7 |
| Gasto dos fogares e ISFLSF | 3,0 | 0,9 | 1,6 | 1,1 | 0,3 | 1,7 |
| Gastos das AA.PP. | 6,6 | 5,0 | 5,5 | 6,2 | 1,7 | 1,7 |
| Formación bruta de capital | -0,2 | -0,7 | 2,4 | 3,8 | 1,5 | 4,8 |
| Demanda interna (en termos nacionais) (*) | 3,1 | 1,5 | 2,5 | 2,6 | 0,8 | 2,2 |
| Exportación de bens e servizos | 0,9 | 4,8 | 4,1 | 2,8 | 1,5 | -1,2 |
| Importación de bens e servizos | 2,3 | 2,4 | 2,9 | 2,4 | -2,1 | -2,0 |
| Fonte: IGE. Contas económicas trimestrais (descarga da táboa) |
Nota: (*) Contribución ao crecemento do PIB
No que respecta á oferta, o Valor Engadido Bruto (VEB) de todos os grandes sectores de actividade rexistra taxas interanuais positivas no segundo trimestre de 2025.
O VEB das ramas primarias rexistra unha taxa de variación interanual do 0,1% (3,1% no trimestre anterior). Pola súa parte, o VEB da industria medra un 2,4%, sendo a taxa no trimestre precedente do 1,4%. O VEB do sector da construción crece un 6,6% (6,3% no primeiro trimestre). O sector servizos rexistra unha taxa do 2,7% (2,9% no trimestre anterior).
| Compoñentes | 2024/I | 2024/II | 2024/III | 2024/IV | 2025/I | 2025/II |
|---|---|---|---|---|---|---|
| VEB. Agricultura, gandaría, silvicultura e pesca | 4,2 | 4,1 | 1,4 | 2,9 | 3,1 | 0,1 |
| VEB. Industria | 4,4 | 4,4 | 5,1 | -0,6 | 1,4 | 2,4 |
| VEB. Construción | 2,6 | 5,2 | 4,8 | 6,5 | 6,3 | 6,6 |
| VEB. Servizos | 1,8 | 2,7 | 3,0 | 3,6 | 2,9 | 2,7 |
| Impostos netos sobre os produtos | 0,7 | 0,1 | 0,7 | 1,0 | 1,2 | 0,0 |
| Fonte: IGE. Contas económicas trimestrais (descarga da táboa) |
Evolución do valor engadido bruto por sectores. Volume encadeado referencia ano 2020=100. Datos corrixidos de efectos estacionais e de calendario. Taxas de variación interanual
Unidade: porcentaxe
Fonte: IGE. Contas económicas trimestrais (descarga da táboa)
2 Produto Interior Bruto a prezos correntes e deflactor implícito
No segundo trimestre do 2025, o PIB, valorado a prezos correntes e con datos corrixidos de efectos estacionais e de calendario, rexistra unha variación interanual do 5,8%, catro décimas inferior á rexistrada no trimestre anterior. O deflactor implícito do PIB medrou un 3,2% neste trimestre.
A variación intertrimestral do PIB a prezos correntes sitúase no 1,2% (1,3% no trimestre anterior).
3 Emprego e produtividade
Os postos de traballo equivalentes a tempo completo rexistran un crecemento interanual do 1,4%, catro décimas superior ao do trimestre anterior.
| Dato | 2024/I | 2024/II | 2024/III | 2024/IV | 2025/I | 2025/II |
|---|---|---|---|---|---|---|
| Postos de traballo equivalentes a tempo completo | 2,1 | 1,5 | 1,4 | 1,4 | 1,0 | 1,4 |
| Horas traballadas | 2,3 | 0,6 | 0,6 | 0,4 | -0,1 | 0,4 |
| Fonte: IGE. Contas económicas trimestrais (descarga da táboa) |
As horas traballadas aumentan un 0,4% en taxa interanual no segundo trimestre (-0,1% no trimestre anterior).
A produtividade aparente real por posto de traballo equivalente a tempo completo medrou un 1,1% neste trimestre, mentres que a produtividade por hora traballada incrementouse un 2,1%.
4 Notas metodolóxicas
As Contas económicas trimestrais son unha estatística de síntese de carácter conxuntural. O seu obxectivo primordial é proporcionar unha descrición cuantitativa e coherente do conxunto da actividade económica galega. Con esta finalidade, elabórase un cadro macroeconómico que ofrece o ritmo de crecemento do PIB galego e das súas compoñentes.
Esta actividade é unha réplica trimestral simplificada das Contas económicas anuais que, pola súa maior frecuencia de elaboración, permite o seguimento conxuntural da actividade económica. Estas estimacións axústanse aos mesmos principios de coherencia e equilibrio contable que as contas de frecuencia anual e, por conseguinte, ao marco do Sistema Europeo de Contas 2010 (SEC-2010). Pódese dicir que as Contas económicas trimestrais supoñen un compromiso entre o rigor e a amplitude das Contas anuais e a rapidez e oportunidade dos indicadores conxunturais.
As utilidades concretas das Contas económicas trimestrais de Galicia son as seguintes:
Medir a evolución da economía no tempo de forma continua e coherente.
Incrementar a calidade do sistema estatístico conxuntural.
Dado o seu carácter sintético e integrador, identifica carencias, suxire cambios e propón un marco de referencia común, susceptible de utilización por estatísticas dispares.
Permite estimar modelos econométricos trimestrais, útiles na análise de políticas económicas e na previsión.